- O Programa de Realoxo estable que se empregarán preferentemente vivendas de promoción pública
e, cando se careza das mesmas, farase a través do Programa Aluga
- Ata o momento adxudicáronse 16 vivendas, todas de promoción pública propiedade do IGVS
- Outras 17 solicitudes están en tramitación
Santiago, 31 de maio de 2013. O Diario Oficial de Galicia publica hoxe a Orde pola
que se determina como colectivo de atención preferente con axudas excepcionais ás persoas afectadas
por execucións hipotecarias no marco do Programa Aluga.
O Programa dixírese a paliar o problema das
execucións hipotecarias nas capas máis desfavorecidas da sociedade e pretende complementar as
medidas instrumentadas polo Goberno central.
Coa mesma regúlanse as condicións de acceso
ao Programa Aluga dos beneficiarios do Programa de Afectados por Execucións Hipotecarias, aprobado
polo Consello da Xunta no pasado mes de decembro. O Programa establece que os beneficiarios de dito
programa serán realoxados preferentemente en vivendas de promoción pública e, cando non se dispoña
das mesmas, en vivendas do Programa Aluga.
A Orde asinada polo Conselleiro establece
que serán considerados como colectivo de atención preferente no marco do Programa Aluga as persoas
que se viran privadas da súa vivenda habitual como consecuencia de procedementos xudiciais ou
extraxudiciais de execucións hipotecarias. Asemade, serán considerados colectivo prioritario ou de
colectivo cualificado cando os ingresos anuais ponderados sexan inferiores a 0,7 veces o
IPREM.
Os integrantes de ditos colectivos terán
dereito á adxudicación directa de vivendas incorporadas ao Programa Aluga, coas seguintes
subvencións sobre o prezo do aluguer:
- Ingresos inferiores a 1 vez o IPREM: 100%
da renda anual do aluguer.
- Entre 1 e menos de 2 veces o IPREM: 70% da renda anual do aluguer.
- Entre 2 e ata 2,5 veces o IPREM: 60% da renda anual do aluguer.
Compre lembrar que o primeiro Consello da
Xunta da actual lexislatura aprobou no pasado mes de decembro a adxudicación directa de vivendas de
promoción pública aos afectados por desafiuzamentos que cumpran uns determinados requisitos, así
como o inicio da tramitación para implantar medidas complementarias ao amparo do Programa Aluga,
para satisfacer as necesidades onde non se dispoña de vivendas de promoción pública ou non se
adapten ás necesidades das familias afectadas. En definitiva, o Goberno galego non só se preocupa
senón que tamén se está a ocupar desta situación dende o primeiro momento.
A Xunta de Galicia manterá esta política de
actuación, a de dispoñer medidas dentro das súas posibilidades, e sempre conforme a criterios de
racionalidade e proporcionalidade, a seguir contribuíndo a paliar os problemas causados polos
desafiuzamentos.
Dende a creación do Programa de Realoxo de
Afectados por Execucións Hipotecarias xa foron adxudicadas 16 vivendas a outros tantos
solicitantes, das que 12 corresponden á provincia de Pontevedra e catro á da Coruña. Outras 17
solicitudes están en tramitación, 11 na provincia de Pontevedra e seis na da Coruña. Polo momento
todas as solicitudes foron atendidas a través de vivendas de promoción pública propiedade do
Instituto Galego da Vivenda e Solo. Nas provincias de Lugo e Ourense non se rexistraron
solicitudes.
Outras actuacións da Xunta de Galicia
A Xunta de Galicia, no ámbito das súas competencias, xa introduciu medidas específicas na Lei
de vivenda dirixidas a paliar os efectos das execucións hipotecarias.
Así, a Lei regula as vivendas de inserción
ou asistenciais. Trátase de vivendas de promoción pública promovidas en colaboración entre o IGVS e
administracións públicas ou entidades sen ánimo de lucro que leven a cabo actividades e programas
de carácter social, para que poidan dispoñer de vivendas e destinalas a persoas que requiran
especial atención polas súas circunstancias persoais, económicas ou sociais.
Tamén no eido da vivenda de promoción
pública, o artigo 54 establece a posibilidade de aprazar ou fraccionar o pagamento das vivendas no
caso de imposibilidade acreditada de pagamento da vivenda de promoción pública por unha situación
transitoria de precariedade económica.
Polo que respecta ás vivendas de protección
autonómica (de promoción privada), a Lei de vivenda posibilita a adquisición das ditas vivendas por
parte de entidades financeiras, mentres que ata o de agora os propietarios das vivendas protexidas
so podían ser persoas físicas.