-
O director xeral así llelo indicou aos alcaldes de Ribeira e Pobra do Caramiñal e aos
presidentes das Asociacións de Empresarios de ambas localidades.
-
O parque empresarial ocupará unha superficie total de 892.931 metros cadrados.
-
O investimento total superará os 47 millóns de euros
Santiago, 17 de xuño de 2010.- O Instituto Galego da Vivenda e Solo está estudando
a posibilidade de desenvolver por fases o parque empresarial do Barbanza, nos concellos de A Pobra
do Caramiñal e Ribeira, como maneira máis rápida de ofrecer solo empresarial nesa comarca.
O director xeral do IGVS, Antonio Boné, comunicou esa posibilidade nunha xuntanza celebrada
hoxe na sede do organismo cos alcaldes de Ribeira, José Luís Torres Colomer, e A Pobra do
Caramiñal, Isaac Maceiras Rivas, e os presidentes das asociacións de empresarios de Ribeira e A
Pobra do Caramiñal, José Paz Cadaval e Manuel Tomé Area.
Demanda solo empresarial
Boné indicou que era consciente da demanda de solo empresarial existente na comarca, na que
insistiron tanto os alcaldes coma os presidentes das asociación de empresarios, manifestando que o
IGVS está interesado en poder ofrecer solo empresarial na zona á maior brevidade posible, e que iso
pasa pola modificación do proxecto para poder realizar o parque por fase, en función da demanda
real de solo existente.
O director xeral do IGVS indicou na reunión que o parque empresarial do Barbanza ocupará unha
superficie total de 892.931 metros cadrados, que se emprazarán nos concellos de Ribeira e A Pobra
do Caramiñal practicamente ao 50 por cento. O investimento supera os 47 millóns de euros.
Na mesma reunión Antonio Boné indicou que se está avanzando na tramitación do proxecto
sectorial, no que se incluirá a execución por fases, coa recepción da meirande parte dos informes
sectoriais preceptivos, prevíndose unha intensificación dos traballos para conseguir a aprobación
do proxecto sectorial no menor prazo posible.