Santiago de Compostela, 28 de xullo de 2009.- A demora no realoxo de 15 vivendas
chabolistas do poboado co Carqueixo, en Lugo, débese exclusivamente a que o Concello aínda non
xustificou a compra das vivendas necesarias para dito realoxo, tal e como establece o convenio
asinado o 18 de setembro de 2008 entre o Concello de Lugo e a antiga Consellería de Vivenda e Solo.
Dito convenio establece que o Concello de Lugo adquirirá 15 vivendas para o realoxo doutras tantas
familias chabolistas, cun orzamento máximo de 1,72 millóns de euros, achegando Vivenda o 65% dos
fondos precisos (máximo 1.118.000 euros). O convenio indica que “tendo en conta a dificultade para
atopar vivenda en venda para dedicar ás actuacións de realoxamento de chabolistas, o período de
execución do presente convenio será de dous exercicios orzamentarios”. Establecíase que en 2008 o
Concello mercaría oito vivendas e as sete restantes en 2009. A data de hoxe o Concello de Lugo
xustificou a compra das oito vivendas correspondentes á anualidade de 2008. O importe
correspondente a Vivenda por estas compras foi aboado ao Concello de Lugo no pasado mes de
febreiro. Pola contra, no Instituto Galego da Vivenda e Solo non hai constancia algunha sobre as
sete vivendas que o Concello debe mercar no presente ano. Unha vez que o Concello merque as
vivendas e o acredite coa pertinente documentación, o IGVS procederá ao pagamento da porcentaxe que
lle corresponde aboar polas mesmas, tal como establece o convenio asinado, con cuxo cumprimento se
compromete o IGVS. Polo que respecta á entrega das 57 vivendas de promoción pública construídas en
Fermín Rivera e Aquilino Igrexa Alvariño, están pendentes da resolución do convenio para o realoxo
das 15 familias procedentes de chabolas. Ademais, parte destas vivendas aínda non recibiron a
licenza de primeira ocupación emitida polo Concello. Unha vez que o Concello adquira as 15
vivendas, estas deberán “ser cedidas en arrendamento polo concello por un prazo de dous anos”
segundo establece o convenio.
SAÚDOS,
GABINETE DE COMUNICACIÓN DA CONSELLERÍA DE MEDIO AMBIENTE, TERRITORIO E INFRAESTRUTURAS