- Detalla que tras un investimento de 10 millóns de euros, a Xunta xa dispón de preto da metade
da superficie precisa e iniciará proximamente o proceso de permuta de solo cos propietarios
- Este proceso é posible porque o Concello vén de aprobar provisionalmente o Plan parcial, e
coa aprobación definitiva poderanse licitar as obras de urbanización
- Os traballos de reurbanización e reparación de infraestruturas que se están a executar
inclúen a actuación na rede de saneamento e das galerías de servizos, ademais da renovación do
pavimento e do alumeado público
- A conselleira avanza que neste mes de febreiro adxudicaranse as obras de construción da
senda peonil e ciclista que mellorará a conectividade deste barrio de Vigo
Vigo, 5 de febreiro de 2018.- A conselleira de Infraestruturas e Vivenda, Ethel
Vázquez, avanzou hoxe que a Xunta de Galicia rematará antes do verán as obras de reurbanización e
reparación que se están a executar no barrio vigués de San Paio de Navia a través dun investimento
autonómico de 750.000 euros.
A titular de Infraestruturas e Vivenda supervisou hoxe os traballos nunha visita na que
estivo acompañada do delegado territorial da Xunta en Vigo, Ignacio López-Chaves, e na que asegurou
que, paralelamente, o Goberno galego está a avanzar no proceso de adquisición dos terreos
necesarios para a segunda fase deste polígono, que permitirá a construción de 1.600 vivendas
protexidas na cidade olívica.
En declaracións aos medios, Ethel Vázquez detallou que, a través dun investimento xa
realizado de 10 millóns de euros, a Xunta conseguiu xa preto dos terreos necesarios para a segunda
fase de San Paio de Navia, é dicir, uns 130.000 metros cadrados.
Tendo en conta que o Concello de Vigo vén de conceder a aprobación inicial da modificación do
Plan parcial da ampliación de San Paio de Navia, a Xunta prevé iniciar de forma inmediata o proceso
de permuta de solo cos propietarios interesados. A conselleira engadiu que, unha vez que ese Plan
parcial obteña a aprobación definitiva será posible licitar as obras de urbanización.
Segundo dixo, a ampliación prevista en San Paio de Navia é unha “actuación integral” que,
ademais de posibilitar a construción de case 1.600 vivendas protexidas, tamén permitirá mellorar os
accesos, contar con máis prazas de aparcamento e aumentar os servizos públicos.
En relación coas obras de reurbanización e reparación visitadas hoxe, Ethel Vázquez destacou
que son necesarias polo incremento da poboación e da actividade nesta zona e alcanzan catro rúas:
Poza Cabalo, Limpiño, Lamelas e Pedra Seixa, e un total de 1.300 metros.
Nese contorno construíronse recentemente novas instalacións deportivas e outros equipamentos
que aumentaron o tránsito na zona, facendo necesario executar obras de reparación. A conselleira
concretou que se está a actuar na rede de saneamento (pluviais e fecais), na galería de servizos,
na reposición da pavimentación de rúas e beirarrúas, na sinalización e na xestión de residuos.
Os traballos comezaron a finais do pasado ano e estarán rematados antes da época de verán.
Posteriormente, pasarán a ser de titularidade municipal.
Ethel Vázquez salientou que, na liña de mellorar estas comunicacións en San Paio de Navia
para o desfrute e ocio dos seus veciños, a Xunta tamén prevé construír unha nova senda peonil e
ciclista na estrada autonómica ao seu paso pola parroquia. Esta infraestrutura, que vai mellorar a
conectividade do barrio, será unha vía segura, sostible e integrada na paisaxe, incluída no Plan de
Sendas de Galicia e que se adxudicará este mesmo mes para poder iniciar as obras canto antes.