Inicio

Xunta de Galicia
Estás en ... Inicio » Sala de Comunicacion » Detalle dunha nova

O director xeral do Instituto Galego da Vivenda e Solo, Heriberto García, interveu hoxe no Parlamento de Galicia

O PREZO MEDIO DA VIVENDA EN ALUGUEIRO SÓ SE INCREMENTOU 15 EUROS EN GALICIA NUN PERÍODO DE DEZ ANOS SEGUNDO A ENQUISA ESTRUTURAL A FOGARES

- Heriberto García sinala que no último trimestre de 2017 o prezo máis alto por metro cadrado estaba en Vigo, con 5,4 euros, segundo datos do Observatorio de Vivenda baseados nas fianzas de alugueiro depositadas na Xunta
- Indica que en dez anos se reduciu un 2,2 % a porcentaxe dos inquilinos que destinan ao alugueiro máis do 30 por cento dos seus ingresos
- Subliña que a Xunta, ademais do Bono de Alugueiro Social, porá en marcha axudas de alugueiro do Plan de vivenda, de ata o 100 % a afectados por desafiuzamentos e do 40 % a familias con ingresos de ata 2,5 veces o Iprem
- O prezo máximo de alugueiro fixarase en función da poboación e demanda de vivenda en cada concello e non superará os 350 euros nos pequenos, 400 nos medianos e 500 nas cidades da Coruña, Santiago, Vigo, Ourense e Pontevedra


Santiago de Compostela, 22 de marzo de 2018.- O prezo medio mensual da vivenda en alugueiro en Galicia só se incrementou 15 euros en dez anos, entre 2007 e 2016, segundo datos da Enquisa Estrutural a Fogares do Instituto Galego de Estatística que ofreceu hoxe no Parlamento o director xeral do Instituto Galego da Vivenda e Solo, Heriberto García.

Os mesmos datos indican que nos concellos de menos de 10.000 habitantes, o incremento en dez anos do prezo medio do alugueiro foi de 18,6 euros; nos de entre 10.000 e 20.000 , en 26,41 euros; nos de entre 20.000 e 50.000, 6,46 euros; e nos de máis de 50.000, medrou 18,6 euros.

A renda máis alta de vivenda alugada no último trimestre de 2017 corresponde á cidade de Vigo, con 5,4 euros por metro cadrado, segundo os datos publicados no último boletín do Observatorio de la Vivienda y Suelo do Ministerio de Fomento. Cabe salientar que os datos do prezo do alugueiro empregados polo Ministerio proveñen da información facilitada polas comunidades autónomas sobre as fianzas de alugueiro depositadas polos arrendadores.

Segundo o Observatorio, no último trimestre de 2017 despois de Vigo situábase Santiago de Compostela, con 5 euros por metro cadrado, seguido de Pontevedra (4,4 €/m2), Ourense (4,1 m2) e en Lugo (3,6 m2).

O Observatorio tamén ofrece datos sobre o prezo medio do alugueiro dunha vivenda en diferentes concellos galegos, nos que a superficie media da vivenda varía duns a outros, o que inflúe na cantidade mensual a pagar polos mesmos.

A mensualidade media máis alta correspondía no último trimestre de 2017 a Oleiros, con 540 euros os mes, pero para vivendas cunha media de 142 m2 de superficie. Séguenlle Santiago de Compostela, con 462 euros ao mes (104 m2), Vigo, 454 euros/mes, (96,4 m2), Pontevedra, 424 euros/mes, (103 m2), Redondela, 395 euros/mes, (124 m2), Arteixo, 380 euros/mes, (120 m2), Cangas, Vilagarcía de Arousa.. ata chegar a Ourense, 364 euros/mes, (102 m2), e Lugo, 342 euros/mes, (102 m2).

O director xeral tamén falou do esforzo económico que teñen que facer para acceder á vivenda en alugueiro. Segundo os datos do Instituto Galego de Estatística, a finais de 2016 o 72,18 por cento das familias destinaban ao pago do alugueiro da súa vivenda entre o 10 e o 30 por cento dos seus ingresos, despois de que a porcentaxe se incrementas en preto de tres puntos en dez anos, mentres que no mesmo período a porcentaxe dos que destinan ao alugueiro máis do 30 por cento dos seus ingresos se reduciu nun 2,2 por cento.

Heriberto García recoñeceu que se poden estar dando situacións puntuais de incrementos do prezo do alugueiro da vivenda en zonas concretas de varias localidades ou debido a causas como os usos turísticos das vivendas, que evidentemente non afectan a toda Galicia.

Sinalou que é necesario que os concellos máis afectados polos incrementos dos alugueiros fagan un esforzo para mobilizar os recursos dispoñibles que permitan facerlle fronte á situación. Nese sentido, citou ao Concello de Santiago, que dispón dunha importante bolsa de solo urbanizado para vivenda protexida que non está a mobilizar ou ao da Coruña, que está atrasando a urbanización do parque Ofimático, impedindo que 200 familias ocupen as vivendas xa construídas.

Programas da Xunta
Para facilitar o acceso á vivenda en alugueiro, a Xunta dispón do parque público de vivendas en alugamento composto por 3.500 inmobles cun prezo de renda reducido e moi inferior ao do mercado.

Entre as liñas de axuda da Xunta están o Programa de Vivendas Baleiras, o Bono de Alugueiro Social (do que xa se beneficiaron 507 familias) e as axudas ao alugueiro para sectores de poboación con escasos recursos económicos ou para menores de 35 anos ao amparo do novo Plan de vivenda 2018-2021.

O citado plan prevé axudas para a posta no mercado de vivendas baleiras propiedade de entidades financeiras, que a Xunta xa puxo en marcha en 2015, e doutros propietarios nos que o importe da axuda poderá chegar ao 100 por cento do custe do alugueiro.

Asemade, tamén haberá axudas de ata o 40 por cento do importe da renda para familias con ingresos que non superen 2,5 veces o Iprem (4 ou 5 veces o Iprem para familias numerosas e persoas con discapacidade. O importe do alugueiro non poderá superar os 500 euros nos concellos de A Coruña, Santiago de Compostela, Vigo, Ourense e Pontevedra, 400 euros nos concellos da área 1, que integra ao resto de cidades e principais vilas de Galicia, e 350 euros no resto de concellos.