• O director xeral do Insttituto Galego de Vivenda e Solo participou nunha xornada organizada
por Aproinco, na que detallou as medidas do Goberno galego en materia de rehabilitación de vivendas
• Tamén explicou os principais aspectos do anteproxecto de Lei de Rehabilitación e de
Rexeneración e Renovación Urbana de Galicia, que se atopa en tramitación
A Coruña, 21 de novembro de 2018.- A Xunta de Galicia conta con diferentes medidas
e axudas en materia de rehabilitación, que converten a esta materia no eixo central da política
pública de vivenda. Así o puxo de manifesto esta mañá o director xeral do Instituto Galego da
Vivenda e Solo (IGVS), Heriberto García Porto, nunha xornada sobre as axudas ao alugueiro e a
rehabilitación, organizadas pola Asociación Provincial de Promotores Inmobiliarios da Coruña
(Aproinco). O director do IGVS trasladou que en 2019 Galicia contará con 68 millóns de euros para
rehabilitación de vivendas e edificios residenciais.
García Porto detallou na súa intervención as actuacións directas de rehabilitación que leva a
cabo o IGVS con fondos propios, coa rehabilitación e actuacións en materia de eficiencia enerxética
en vivendas de promoción pública, ademais do Programa Rexurbe, no marco do cal este organismo
adquire inmobles en conxuntos históricos para a súa rehabilitación e posterior incorporación ao
parque público de vivenda en alugueiro propiedade da Xunta de Galicia.
Por outra parte, o IGVS achega aos particulares e comunidades de propietarios axudas para a
rehabilitación de vivendas, con programas destinados á rehabilitación enerxética, conservación e
mellora da seguridade e accesibilidade, axudas para instalacións de ascensores, axudas para a
rehabilitación e mellora de vivendas incluídas no Programa de Vivendas Baleiras e axudas para
rehabilitación de vivendas en catástrofes como os incendios forestais de outubro de 2017 o a
explosión pirotécnica de Paramos, en Tui.
Os concellos tamén son perceptores de axudas do IGVS para a rehabilitación de vivendas, a
través das liña de rehabilitación de vivendas de mestres, outros oficios e outros inmobles de
titularidade municipal, ou o Fondo de cooperación, a través do cal se poden financiar sen xuros
actuacións municipais ou as axudas para infravivenda rural.
Finalmente, o director xeral do IGVS destacou a importancia das Áreas de Rehabilitación
Integral, a través das cales reciben axudas tanto os propietarios de vivendas e as comunidades de
propietarios como os propios concellos. Os propietarios e comunidades reciben axudas para a
rehabilitación dos edificios e vivendas e os concellos para a realización de actuacións de
urbanización e reurbanización no ámbito das ARI, ademais de axudas para o financiamento das
oficinas municipais de rehabilitación.
Actualmente en Galicia están declaradas 69 áreas de rehabilitación, xunto coa área de
rehabilitación dos Camiños de Santiago, o que supón que un total de 128 concellos galegos, máis do
40 por cento do total) dispoñan al menos dunha área de rehabilitación integral.
Por outra parte, o director xeral do IGVS explicou aos asistentes á xornada os principais
aspectos do anteproxecto de Lei de Rehabilitación e de Rexeneración e Renovación Urbana de Galicia,
que se atopa en tramitación e pretende facilitar a rehabilitación das vivendas e edificios de
vivendas existentes en Galicia respectando todo o que debe ser protexido, fomentando a cultura da
rehabilitación e impulsando a dinamización económica, social e demográfica en ámbitos como os
conxuntos históricos galegos.