• Este será o segundo municipio no que o Instituto Galego de Vivenda e Solo ensaiará esta
fórmula construtiva para aumentar o parque de vivendas protexidas
• A conselleira Ángeles Vázquez reuniuse hoxe co alcalde de Sober, Luis Fernández, para
anunciarlle a licitación inminente da redacción de proxecto e obra por un importe de preto de medio
millón de euros
Santiago de Compostela, 27 de novembro de 2018-. A Consellería de Medio Ambiente,
Territorio e Vivenda licitará mañá a redacción do proxecto e a obra para a instalación de tres
novas vivendas modulares de promoción pública no Concello de Sober (Lugo), o segundo municipio
galego en beneficiarse deste programa pioneiro impulsado polo Instituto Galego de Vivenda e Solo.
Así llo trasladou esta mañá a conselleira de Medio Ambiente, Ángeles Vázquez, ao rexedor de
Sober, Luis Fernández, con quen mantivo unha reunión de traballo para abordar diversos asuntos de
interese para o municipio. Concretamente, Vázquez Mejuto explicoulle ao alcalde que o contrato
sairá a licitación por un importe inicial de case 500.000 euros e cun prazo estimado de execución
de 10 meses, polo que a previsión é que o próximo ano estas vivendas estean xa dispoñibles.
Cómpre lembrar que o Concello ourensán de Cenlle foi o primeiro en sumarse a este proxecto
piloto, posto en marcha este mesmo ano polo IGVS e co que se pretende construír pequenos grupos de
vivendas modulares de promoción pública e tipoloxía unifamiliar en concellos eminentemente de
carácter rural.
Con este programa búscase un dobre obxectivo xa que, por un lado, a construción modular supón
unha forma áxil de incrementar o parque de vivendas protexidas existente xa que reduce de forma
notable os tempos de construción e pola outra, tamén representa a aposta da Xunta pola innovación
en materia de edificación residencial.
Neste sentido, cómpre precisar que, unha vez redactado o proxecto construtivo e supervisado
por parte do IGVS, o proceso de construción destas vivendas levarase a cabo na súa totalidade en
fábrica. Deste xeito, o impacto no lugar elixido en Sober para a súa localización será mínimo, xa
que a única obra requirida previa á montaxe e instalación destes inmobles será a execución dos
cimentos.