• Trátase da primeira actuación no marco do programa Rexurbe, no que se prevé rehabilitar
arredor de 38 vivendas
• Estas sumaranse ás 12 xa rehabilitadas por Xestur e adxudicadas en réxime de
alugueiro
Santiago de Compostela, 28 de decembro de 2018.- O Instituto Galego da Vivenda e
Solo licita hoxe a obra de rehabilitación do inmoble emprazado no número 1 da rúa Argüelles no
Concello de Ferrol. Deste xeito, cúmprese o compromiso avanzado pola conselleira de Medio Ambiente,
Territorio e Vivenda, Ángeles Vázquez, durante a súa visita ás actuacións do IGVS en Ferrol Vello,
onde indicou que a licitación desta obra se realizaría en breve.
O IGVS investirá un total de 333.529,97 euros nas obras de rehabilitación deste inmoble, que
dan o pistoletazo de saída as actuacións que recolle o programa Rexurbe na zona de Ferrol Vello.
Coa rehabilitación do inmoble obteranse dúas vivendas de dous dormitorios cada unha, dotadas
co seu correspondente rocho. A superficie total útil das dúas vivendas será de 168,10 metros
cadrados, ademais dos rochos. O inmoble disporá tamén dun local comercial de 39,10 metros cadrados.
Ferrol Vello recibirá un investimento do IGVS de preto de cinco millóns de euros destinados á
adquisición e rehabilitación de inmobles no marco do programa Rexurbe, co que o IGVS pretende
adquirir 13 inmobles seleccionados entre os ofrecidos polo seus propietarios. As actuacións nos
inmobles que se adquiran sumadas a rehabilitación doutros que xa son propiedade do IGVS, como este
de Argüelles 1, darán lugar a arredor de 38 vivendas rehabilitadas, que se sumarán as 12 que xa
rehabilitadas por Xestur e que actualmente están adxudicadas en réxime de alugueiro.