• Os interesados terán ata o vindeiro 7 de xullo para participar no proceso
• A empresa pública ofrece solo urbanizado para promover vivendas protexidas nas cidades da
Coruña, Ferrol, Lugo e Pontevedra
• Poderá adxudicarse en réxime de compravenda ou en dereito de superficie, unha modalidade
que nunca antes se ofertara nun concurso de solo residencial
Santiago de Compostela, 2 de xuño de 2020.- A Xunta de Galicia reanuda o
procedemento para a presentación de ofertas ao concurso de solo residencial convocado pola empresa
pública Xestur, cuxos prazos quedaron suspendidos a causa da covid-19. O prazo para poder
participar rematará o vindeiro 7 de xullo ás 14:00 horas.
Por medio deste concurso público, o Goberno galego pon preto de 38.000 metros cadrados de
solo residencial urbanizado a disposición dos promotores e cooperativas que queiran promover
vivendas protexidas nas cidades da Coruña, Ferrol, Lugo e Pontevedra. Os interesados poden acceder
ao prego das bases e á relación de parcelas ofertadas a través da páxina web de Xestur ou nas
oficinas da empresa pública.
A adxudicación das parcelas poderá realizarse en réxime de compravenda ou, por primeira vez,
en dereito de superficie. Esta segunda forma de adxudicación, que supón o pago dun canon anual
reducido polo uso do solo, supón unha novidade nos concursos de venda de solo residencial
propiedade da Xunta de Galicia, xa que ata o de agora unicamente se ofrecía na modalidade de
compravenda.
As parcelas que se adxudiquen en dereito de superficie destinaranse obrigatoriamente á
construción de vivendas protexidas para alugueiro, en réxime especial ou réxime xeral. O dereito de
superficie terá unha duración de 30 anos.
Para a adxudicación terán preferencia as ofertas que vaian destinadas á construción de
vivendas en alugueiro. No caso de empate entre dúas ou máis ofertas, valorarase a proposta
arquitectónica, as solucións bioclimáticas e de sostibilidade, eficacia enerxética e outras
melloras ofertadas.
Os adxudicatarios das parcelas terán a obriga de solicitar a licenza de edificación no prazo
máximo de catro meses dende a formalización da escritura e as vivendas deberán construírse e
cualificarse como protexidas no prazo máximo de 30 meses dende a concesión da devandita licenza.
Oferta por urbes
No conxunto das cidades ofrécense en total 23 parcelas, que permitirán a construción de 1.381
vivendas protexidas para as familias galegas.
Concretamente, no parque Ofimático da Coruña póñense a disposición nove parcelas, con
edificabilidade para un total de 460 vivendas protexidas; en Ferrol a oferta comprende oito
parcelas emprazadas no Bertón, cunha edificabilidade de 414 VPP; e en Lugo son dúas parcelas as
dispoñibles en Garabolos, con edificabilidade para 370 vivendas. Finalmente, en Pontevedra existen
catro parcelas en Valdecorvos, con edificabilidade para 137 vivendas protexidas.