• A conselleira de Medio Ambiente, Territorio e Vivenda presidiu esta mañá a reunión do xurado
destes premios, que recolle catro modalidades de galardóns e teñen unha dotación global de 24.000€
• Ángeles Vázquez salienta o impulso do Goberno á rehabilitación, coa aprobación da primeira
norma nesta materia, a convocatoria de diferentes liñas de axudas para financiar actuacións e a
convocatoria deste certame, para recoñecer a calidade das edificacións rematadas ou rehabilitadas
en territorio galego
Santiago de Compostela, 18 de setembro de 2020-. A conselleira de Medio Ambiente,
Territorio e Vivenda, Ángeles Vázquez, avanzou esta mañá que o fallo da terceira edición dos
Premios de Arquitectura e Rehabilitación en decembro. Así o concluíron os membros do xurado que
esta mañá celebraron a primeira reunión -presidida por Ángeles Vázquez-, na que coñeceron as
candidaturas presentadas. En total, presentáronse 67 candidaturas de actuacións realizadas nas
catro provincias galegas e dous deses proxectos optan a dúas categorías diferentes.
Entre as actuacións presentadas salientan grandes proxectos que destacan pola súa innovación
e funcionalidade, inmobles destinados a usos educativos que combinan o deseño e o servizo e a
construción e rehabilitación de vivendas unifamiliares en distintos puntos de Galicia, que destacan
polo seu moderno deseño e integración na contorna.
Os premios recollen catro categorías de galardóns, polo que das iniciativas presentadas 23
correspóndense co Premio de Arquitectura, 35 optan ao Galardón á rehabilitación e un terceiro, o
Premio Especial á Sustentabilidade, co que se quere destacar a implementación dunha arquitectura
responsable e comprometida co medio ambiente.
O premio á traxectoria profesional dun arquitecto galego, coa que recoñecer a especial
contribución á arquitectura no territorio galego, pecha a lista de categorías dos premios, dotada
cada unha dun premio metálico de 6.000 euros.
A conselleira recordou que tamén hai unha modalidade de mencións, reservada para destacar
actuacións que non resulten premiadas, pero que o xurado considera merecedoras dun recoñecemento
especial.
Galicia, referente
Ángeles Vázquez salientou que a Xunta é consciente do papel de Galicia como referente estatal
en rehabilitación e do labor dos profesionais que engrandecen o rico patrimonio arquitectónico de
Galicia.
Co fin de recoñecer esta excelencia da rehabilitación e da arquitectura galega, o traballo
dos profesionais e a sustentabilidade nas construcións creáronse en 2016 os galardóns de
Arquitectura e Rehabilitación. Este recoñecemento á rehabilitación complétase coa Lei de
rehabilitación, coa que conta por primeira vez á Comunidade, e coas diferentes liñas de axudas que
habilita o Goberno galego para financiar e colaborar na rehabilitación do patrimonio edificatorio
de Galicia.
Para concluír, a conselleira destacou que o Goberno galego continuará impulsando medidas e
ferramentas que protexan e polas en valor a paisaxe, o territorio e o urbanismo da Comunidade
galega.