• A conselleira Ángeles Vázquez mantivo esta mañá unha xuntanza coa directiva do Colexio
oficial de administradores de Galicia para analizar o impacto que están a ter as restricións
impostas pola Covid-19 no funcionamento ordinario do sector
Santiago de Compostela, 31 de xullo de 2020-. A Consellería de Medio Ambiente,
Territorio e Vivenda e o colectivo dos administradores de fincas colaborarán co fin de establecer a
curto prazo un novo protocolo de seguridade que permita reunirse ás comunidades de veciños con
plenas garantías sanitarias. Así o acordaron hoxe a conselleira Ángeles Vázquez e unha
representación da directiva do Colexio de Administradores de Fincas de Galicia, encabezada polo seu
presidente, Martín Bermúdez de la Puente.
Durante o encontro, os administradores trasladáronlle á responsable autonómica a súa
preocupación ante as dificultades coas que se atopan para poder convocar as xuntas ordinarias
anuais de propietarios debido ás restricións impostas pola Covid-19 con relación á celebración de
reunións e ás limitacións no número de asistentes.
Neste sentido, lembraron a obrigatoriedade de celebrar este tipo de xuntanzas polo menos unha
vez ao ano, así como a necesidade de tomar acordos importantes para o bo funcionamento das
comunidades veciñais, como a renovación dos seus cargos directivos ou a aprobación dos orzamentos
do próximo ano.
Pola súa parte, a conselleira de Medio Ambiente amosouse disposta a colaborar co Colexio na
busca dunha solución que permita garantir a seguridade dos propietarios e á vez cumprir coas
obrigas propias dos seus comuneiros. Así, propuxo trasladarlle ao Instituto de Seguridade e Saúde
Laboral de Galicia (ISSGA) a necesidade de deseñar un protocolo de actuación específico ante o
coronavirus para a celebración de xuntas veciñais, similar ao que xa se aplica noutros sectores.
De feito, cómpre lembrar que nos últimos meses o ISSGA foi o organismo encargado de elaborar
guías cunha serie de recomendacións e criterios de prevención fronte á Covid-19 adaptados a
diferentes sectores de actividade, como o comercio ou a construción.