• Ángeles Vázquez avanza que demandará unha vez máis ao Ministerio de Fomento a
convocatoria urxente dunha Conferencia Sectorial na que se informe ás comunidades como será o
reparto de máis de 5.000 M€ dos fondos europeos
• Reitera a necesidade de apostar por un instrumento áxil, eficaz e flexible que permita ás
comunidades o axuste dos termos da tramitación e os requirimentos de cada programa do Plan de
recuperación e resiliencia da Comisión Europea
Santiago de Compostela, 26 de marzo de 2021.- A conselleira de Medio Ambiente,
Territorio e Vivenda, Ángeles Vázquez, reiterou esta mañá a necesidade de que o Goberno central
concrete os programas e os prazos dos distintos programas en materia de vivenda que disporán de
fondos europeos.
A conselleira de Medio Ambiente falou desta demanda no transcurso dunha xornada en liña sobre
os fondos europeos para a rehabilitación e eficiencia enerxética con 240 arquitectos, enxeñeiros,
promotores, construtores e administradores de fincas, para transmitirlles a información, “moi
escasa e difusa”, da que dispón da Xunta sobre estes programas e os investimentos que se
mobilizarán nos vindeiros anos.
Segundo explicou Vázquez Mejuto, ademais de solicitar concreción dos programas, tamén
trasladará ao Ministerio a necesidade de simplificar a tramitación administrativa das axudas en
materia de vivenda dos distintos programas do Plan de recuperación e resiliencia da Comisión
Europea e apostar por un instrumento áxil, eficaz e flexible e que permita ás comunidades o axuste
dos termos da tramitación e os requirimentos concretos.
A conselleira aclarou que todas estas dúbidas e cuestións deben ser abordadas nunha reunión
da Conferencia Sectorial, polo que solicitou a convocatoria urxente da mesma, para que as
comunidades coñezan o reparto dos 5.320 M€ que se distribuirán entre as cinco modalidades
previstas: o programa de rehabilitación para a recuperación económica e social en contornas
residenciais; o de rehabilitación enerxética de edificios; o de transición enerxética e reto
demográfico; para a rehabilitación sostible e dixital de edificios públicos; e, por último, o
programa de axudas para a elaboración de proxectos piloto de plans de acción local da Axenda Urbana
Española.
Non obstante, a conselleira salientou que, mentres se agarda pola información do Ministerio,
a Xunta non queda parada e está a activar as liñas de axudas e programas que se recollen no Pacto
Social pola Vivenda.
A modo de exemplo recordou as cinco liñas convocadas esta mesma semana, para a recuperación
de edificios e vivendas de titularidade municipal por un importe de 1,7 millóns de euros; as axudas
para actuacións nas tres áreas de rehabilitación supramunicipais, cun orzamento global de máis de 2
millóns; as subvencións ao programa de fomento da conservación, da mellora da seguridade e de
accesibilidade, que contarán con 680.000 euros; e as axudas para infravivenda, cun orzamento
inicial de case 275.000 euros.
Trátase duns incentivos que se completarán nos próximos días coa convocatoria das axudas ao
alugueiro, así como das axudas a persoas en situación de vulnerabilidade pola covid-19, cun
orzamento total entre as dúas de máis de 4 millóns de euros.
