• Vázquez Mourelle concreta que os inmobles obxecto das actuacións de rehabilitación que
comezaron esta semana están situados nas rúas Recanto do Miño 11-13, Recanto do Miño 17 e Tinería
30
• Subliña que no momento no que o Concello conceda a licenza de obras, a Xunta tamén está en
disposición de comezar xa as obras en Tinería 15, xa adxudicadas, cun orzamento duns 700.000 euros
• Indica que paralelamente o Goberno galego avanza no proxecto de urbanización e execución
das vivendas do contorno do pazo de dona Urraca, a zona UI-8
• O Executivo autonómico leva tempo traballando arreo na recuperación integral e a posta en
valor desta zona histórica, polo que xa existen 36 edificios totalmente rehabilitados, propiedade
autonómica
• A conselleira engade que a Xunta, no marco do programa Rexurbe, está a analizar toda a
documentación achegada polos propietarios de inmobles no casco histórico de Lugo co fin de
adquirilos e rehabilitalos
Lugo, 14 de setembro de 2018.- A conselleira de Infraestruturas e Vivenda, Ethel
Vázquez, xunto co delegado territorial da Xunta en Lugo, José Manuel Balseiro, supervisou hoxe o
inicio da rehabilitación de tres edificios na Tinería, cun investimento de medio millón de euros,
que permitirán no outono do vindeiro ano poñer a disposición dos veciños 4 novas vivendas e un
local comercial.
Os edificios obxecto das actuacións de rehabilitación que comezaron esta semana están
situados nas rúas Recanto do Miño 11-13, Recanto do Miño 17 e Tinería 30.
Vázquez Mourelle subliñou que no momento no que o Concello conceda a licenza de obras, a
Xunta tamén está en disposición de comezar xa as obras en Tinería 15, xa adxudicadas, cun orzamento
duns 700.000 euros.
Concretou que paralelamente o Goberno galego avanza tamén no proxecto de urbanización e
execución das vivendas do contorno do pazo de dona Urraca, a denominada zona UI-8.
O Executivo autonómico leva tempo traballando arreo na recuperación integral e a posta en
valor desta zona histórica, polo que na Tinería existen 36 edificios totalmente rehabilitados,
propiedade da Xunta, aos que hai que engadir as obras comezadas esta semana, ou cos 9 locais
comerciais alugados ao Concello para poñelos á disposición.
Ethel Vázquez destacou a aposta do Goberno galego pola conservación, pola protección do noso
patrimonio e pola revitalización deste conxunto histórico, xa que hai uns meses asinouse un
convenio para actuar sobre a Casa-Torre, na rúa Rinconada do Miño, e o pazo de dona Urraca.
Trátase de continuar co labor de recuperación e posta en valor desta zona antiga, impulsando
a rehabilitación integral e a promoción da actividade económica para que na Tinería residan novas
familias e se asenten negocios.
A conselleira engadiu que a Xunta vai seguir investindo e adquirindo novos edificios para a
súa rehabilitación, ao amparo do programa Rexurbe. Nestes momentos, en Lugo, estase a analizar toda
a documentación achegada polos propietarios e cóntase coa compra de novos inmobles.
Concluíu que o investimento da Xunta no barrio da Tinería, en global, ascende a un total de
máis de 28 millóns de euros, entre as actuacións executadas e as obras en marcha ou inmediatas.