• A conselleira de Medio Ambiente, Territorio e Vivenda avanza que o acordo acadado hoxe
permitirá crear un espazo público un 25% máis amplo e aberto, dando un valor incalculable a esta
zona aos pés da Muralla
• Ambas administracións destacan o positivo de traballar de forma coordinada e conxunta,
para sumar un atractivo máis nun barrio emblemático da Cidade da Muralla, como é o Barrio da
Tinería
• Ángeles Vázquez adianta que as contas do seu departamento para o ano 2021 consignan 4,6
millóns de euros en actuacións de recuperación e rehabilitación de vivendas, así como a ampliación
do polígono das Gándaras
Lugo, 23 de novembro de 2020.- A conselleira de Medio Ambiente, Territorio e
Vivenda, Ángeles Vázquez, salientou esta mañá que o 2021 será o ano de impulso ao Pazo de Dona
Urraca, grazas á modificación do Plan Especial de Protección, Rehabilitación e Reforma Interior
(Pepri) e aos proxectos de urbanización deste novo espazo do Barrio da Tinería, no Concello de
Lugo.
A conselleira de Medio Ambiente, Territorio e Vivenda, Ángeles Vázquez, e a alcaldesa de
Lugo, Lara Méndez, asinaron esta mañá o protocolo de actuación entre a Xunta de Galicia e o
Concello de Lugo, que inclúe a modificación do Pepri existente no que se recolle unha serie de
edificacións e a creación dunha praza contigua á Muralla.
Sinalou que Xunta e Concello coinciden en que a recuperación deste ámbito quedaría máis
completa e harmoniosa actuando de xeito coordinado e conxunto; polo que o Instituto Galego de
Vivenda e Solo e o Concello levan meses traballando nunha solución que convenza a ambas
administracións en beneficio e interese dos veciños da Cidade da Muralla.
Así, o protocolo asinado esta mañá establece que o Concello de Lugo adquirirá varios inmobles
da contorna para ceder á Xunta; mentres que a Xunta redactará a modificación do planeamento do
UI-8, a través dun instrumento simplificado que recolle a Lei de rehabilitación, e acometerá as
obras de urbanización do ámbito, así como unha serie de inmobles colindantes, parte dos cales que
deberá adquirir a Administración local e que sumarán aos que xa son propiedade do IGVS.
Ángeles Vázquez recordou que esta proposta implica reducir nun 35% a edificabilidade dos
terreos propiedade da Xunta, en aras de crear un espazo público un 25% máis amplo e aberto, dando
un valor incalculable a esta zona aos pés da Muralla e un protagonismo total ao Pazo de Dona
Urraca, e bríndase un novo atractivo para completar a recuperación patrimonial e social do Barrio
da Tinería.
A conselleira de Medio Ambiente explicou que, unha vez firmado o protocolo, o IGVS iniciará a
redacción da modificación do Pepri, ao tempo que o Concello tramitará o convenio urbanístico, coa
previsión de envialo ao Concello no primeiro cuatrimestre do ano para a súa tramitación. Engadiu
que mentres a administración local tramita a modificación, o IGVS irá redactando os proxectos de
urbanización dos espazos públicos e os proxectos de construción dos tres novos edificios.
Indicou que, segundo as previsións do IGVS, serán necesarios máis de 4 millóns de euros para
levar a cabo as obras de urbanización da UI-8, de rehabilitación do Pazo de Doña Urraca e de
rehabilitación dos inmobles para vivendas de promoción pública. O vindeiro exercicio será o ano no
que se aborden, fundamentalmente, os traballos técnicos: como a modificación do Pepri, o convenio
urbanísitico, a redacción do proxecto de urbanización e dos proxectos de redacción, etc..; mentres
que as obra comezarían no 2022, sempre que a licitación das mesmas se poida realizar a finais de
2021.
A Xunta, acompañado polo Concello, dá un paso máis nas actuacións de rehabilitación e
reurbanización da Tinería, un barrio clave e con moita proxección para a cidade de Lugo, a través
do desenvolvemento dun espazo que se converterá nunha icona para toda a veciñanza.
Orzamentos do ano 21
A conselleira de Medio Ambiente aproveitou o encontro desta mañá para trasladarlle á
alcaldesa de Lugo os puntos fortes do orzamento do seu departamento para a Cidade de Lugo, do que
destacou catro actuacións en materia de vivenda, solo empresarial e coidado do medio ambiente que
suman un orzamento de 4,6 millóns de euros.
Salientou que o Goberno galego seguirá apostando pola rehabilitación do Barrio da Tinería en
2021, polo que se reserva un orzamento de 800.000 euros para actuacións de recuperación. Tamén en
materia de vivenda destacou un orzamento de 200.000 euros para actuacións de reparación de vivendas
de promoción pública.
As obras de urbanización da segunda fase do polígono das Gándaras, que comezarán antes de que
remate o ano, terán un protagonismo importante nas contas da Consellería do vindeiro ano, pois
resérvanse 3,1 millóns de euros para a ampliación do parque, que xa na segunda fase, se disporán
case 90.000 m2 novos nesta zona.
Por último, destacou a partida de 500.000 euros que a Dirección Xeral de Patrimonio Natural
reserva dos seus orzamentos para levar a cabo a construción dunha nova nave no Centro de
Recuperación de Fauna Silvestre de O Veral.