-
A Xunta de Galicia subvencionará a adquisición de vivendas por familias
con ingresos inferiores a 2,5 veces o Iprem, así como a adquisición por menores de 35 anos,
familias numerosas e monoparentais, dependentes, persoas con discapacidades, vítimas da violencia
doméstica e do terrorismo, separados e divorciados, emigrantes retornado e chabolistas terán un
tratamento preferencial
-
Preto de 600 millóns de euros en axudas inducirán un investimento de máis
de 3.000 millóns de euros e a creación de máis de 40.000 empregos
Santiago, 6 de novembro de 2009.-
A partir de hoxe poderanse solicitar as axudas previstas no Plan de
Vivenda 2009-2012 para adquisición e rehabilitación de vivendas. O Diario Oficial de Galicia
publicou onte o decreto autonómico polo que se establecen as axudas públicas en materia de vivenda
a cargo da Comunidade Autónoma de Galicia e se regula a xestión das previstas no decreto estatal do
Plan de Vivenda.
A Xunta de Galicia subvencionará con 2.000 euros a adquisición de vivendas
por familias con ingresos familiares que non superen 2,5 veces o Iprem (Indicador Público de Renta
de Efectos Múltiples).
Tamén recibirán unha subvención de 2.000 euros para a adquisición de
vivenda por menores de 35 anos, familias numerosas de ata 4 fillos, familias monoparentais con
fillos, familias con dependentes ou con membros con discapacidade, mulleres vítimas da violencia de
xénero, vítimas do terrorismo e persoas separadas ou divorciadas que perderan as súas vivendas.
Nestes casos o nivel máximo de ingresos será de 4,5 veces o Iprem. No caso de familias numerosas de
cinco ou máis fillos a subvención será de 4.000 euros. Todas estas subvencións autonómicas son
compatibles e acumulables para os solicitantes que se atopan en máis dunha das situacións
indicadas
Ademais, a Xunta de Galicia subvencionará a adquisición de vivenda por
parte de grupos en grave risco de exclusión social (chabolistas e emigrantes retornados en
especiais dificultades) que acceden á vivenda en propiedade. Nestes casos a axuda será do 25 por
cento, cun límite máximo de 17.000 euros. Esta axuda, que xa fora introducida pola Xunta de Galicia
nos planes 2002-2005 e 2005-2008, non é compatible co resto de axudas autonómicas.
Axudas estatais
As axudas establecidas pola Xunta de Galicia son compatibles coas
financiadas polo Ministerio de Vivenda pero xestionadas pola Xunta de Galicia.
As subvencións estatais poden acadar un máximo de 8.000 euros para todos
os adquirentes de vivenda protexida con ingresos que non superen 2,5 veces o Iprem.
A contía fixarase en 7.000 e 5.000 euros, cando os ingresos están entre
2,5 e 3,5 ou entre 3,5 e 4,5 veces o Iprem respectivamente.
Todas as axudas estatais para os solicitantes con ingresos entre 3,5 e 4,5
veces o Iprem son de nova creación neste Plan, o mesmo que no caso das axudas
autonómicas.
Os menores de 35 anos terán unha axuda de 9.000, 8.000 ou 6.000 euros
segundo os tramo de ingresos no que se atopen.
As axudas poderán acadar os 12.000 euros no caso de familias numerosas,
familias monoparentais con fillos e familias con persoas dependentes ou con discapacidades
oficialmente recoñecidas, sempre que os ingresos non superen 2,5 veces o Iprem. Para os outros dous
tramos de renda (2,5-3,5 e 3,5-4,5 Iprem) as axudas serán de 10.000 e 8.000 euros,
respectivamente.
Finalmente haberá unha axuda de 11.000 euros para mulleres vítimas da
violencia de xénero, vítimas do terrorismo e persoas separadas ou divorciadas, que perderon a súa
vivenda e estean ao corrente de pago das pensións alimenticias ou compensatorias e teñen ingresos
que non superen 2,5 veces o Iprem. Para as familias comprendidas neste suposto e nos outros dous
tramos de renda a axuda será de 9.000 e 7.000 euros respectivamente.
Estas axudas non son compatibles entre si, pero poden acumularse coas da
Xunta de Galicia.
Subsidiación do préstamo
Ademais todos os compradores de vivendas ao amparo deste decreto, con
ingresos que non superen 4,5 veces o iprem, terán dereito á subsidiación do préstamo obtido para a
compra da vivenda. A subsidiación será aplicable durante os cinco primeiros anos do préstamo,
ampliables a outros cinco, e a súa contía será de ata 100 euros por cada 10.000 euros de préstamo,
segundo os tramos de renda nos que se atopen os beneficiarios (80 euros para o tramo intermedio e
60 para o superior). Esta subsidiación incrementarase en 50 euros para familias numerosas, familias
monoparentais con fillos e familias con persoas dependentes ou con discapacidade cuxos ingresos non
superen 2,5 veces o Iprem. No caso de que os ingresos estean entre 2,5 e 4,5 veces o Iprem o
incremento da subsidiación será de 30 euros por cada 10.000 de préstamo
Rehabilitación
O Plan de Vivenda establece tamén axudas para a rehabilitación de vivendas
e edificios de vivendas, que se centrarán fundamentalmente en actuacións dirixidas a mellorar a
eficiencia enerxética, hixiene, saúde e protección do medio ambiente nas vivendas; á utilización de
enerxías renovables; actuacións para a mellora da accesibilidade das vivendas e os edificios de
vivendas e actuacións para garantir a seguridade e estanquidade dos edificios.
No caso de rehabilitacións de vivendas individuais a subvención pode
acadar o 25 por cento do orzamento protexido cun límite máximo de 2.500 euros. Este límite
incrementarase ata 3.400 euros cando os propietarios ou ocupantes da vivendas sexan maiores de 65
anos ou persoas con discapacidade, sempre que as obras se destinen á eliminación de barreiras ou á adecuación da vivenda ás súas necesidades
específicas. Cando se trate de vivendas rehabilitadas con destino a aluguer durante un prazo mínimo
de 5 anos, nas mesmas condicións que as vivendas protexidas destinadas a arrendamento, o límite
máximo da axuda será de 6.500 euros.
Para a rehabilitación de zonas comúns de edificios de vivendas, a
subvención será do 10 por cento do presuposto protexido correspondente a cada propietario, cun
importe máximo de 1.100 euros por vivenda. Cando os ingresos non superan 6,5 veces o Iprem, pódese
obter unha axuda adicional do 15 por cento do presuposto, cun límite de 1.600 euros por vivenda,
que pasará a ser de 2.700 no caso de que os beneficiarios sexan maiores de 65 anos, persoas con
discapacidade ou as obras se destinen á eliminación de barreiras ou á adecuación da vivenda ás súas
necesidades específicas
Obxectivos
O Plan de Vivenda 2009-2012 en Galicia prevé a promoción de 13.780
vivendas protexidas de nova construción ao longo dos catro anos de vivencia do mesmo, das que 9.620
serán para venda e 3.980 para alugueiro. Asemade, o Ministerio de Vivenda cofinanciará a
construción de 180 vivendas de promoción pública. Tamén se prevén axudas para a adquisición de
1.070 vivendas usadas.
O decreto establece a posibilidade de calificar como protexida unha soa
vivenda dentro dun edificio de vivendas libres, ademais da calificación por edificios completos ou
plantas dos mesmos.
Doutra banda, poderán acollerse ás axudas do Plan de Vivenda, cumprindo os
requisitos establecidos para as protexidas, as vivendas libres cando se trate da primeira venda e
pasara polo menos un ano dende a obtención da licenza de primeira ocupación.
Polo que respecta ao alugueiro, ademais da promoción de vivendas de nova
construción destinadas ao mesmo, o Plan de Vivenda prevé que a través do mesmo se financien 3.270
axudas a inquilinos acollidas ao programa de axudas ao alugueiro.
Asemade, o plan prevé actuacións de rehabilitación, tanto en Areas de
Rehabilitación Integral (ARIS) como en Áreas de Renovación Urbana (ARUS), erradicación do
chabolismo e axudas Renove, destinadas a mellorar a eficiencia enerxética, a hixiene, saúde e
protección do medio ambiente nos edificios e vivendas, e a utilización de enerxías renovables. En
total os diferentes programas de rehabilitación prevén 29.025 actuacións no conxunto do
Plan.
Finalmente o Plan de Vivenda 2009-2012 prevé a creación de solo
residencial para a construción dun total de 3.610 vivendas protexidas, das que a meirande parte
estarán en áreas prioritarias.
En total, os obxectivos iniciais do Plan de Vivenda 2009-2012 supoñen un
incremento de máis do 56 por cento respecto dos obxectivos iniciais do anterior plan
Investimento
Preto de 600 millóns de euros serán destinados en Galicia para axudas para
adquisición e rehabilitación de vivendas e promoción de solo residencial para a construción de
vivendas protexidas entre a Xunta de Galicia e o Estado.
Esta inxección económica terá efectos sobre o conxunto da economía da
Comunidade Autónoma, xa que se estima un investimento global, incluíndo as achegas de promotores,
particulares e administracións públicas, que superen os 3.000 millóns de euros e supoñan a creación
de máis de 40.000 postos de traballo.