-
O Plan permite cualificar como protexidas vivendas individuais incluídas
en promocións de vivendas libres en construción, así como a venda ao abeiro do mesmo de vivendas
libres xa construídas
Santiago, 11 de novembro de 2009.-
O director xeral do Instituto Galego da Vivenda e Solo, Antonio Boné,
recibiu está mañá ao alcalde de Arbo, Manuel Rivera Domínguez, dado o interese do mesmo polo novo
Plan de Vivenda 2009-2012, que entrou en vigor a pasada semana.
Na reunión, Boné explicou as distintas posibilidades que ofrece o Plan
para a promoción de vivendas protexidas e a venda de vivendas xa existentes ao abeiro do
mesmo.
O Plan de Vivenda 2009-2012 permite a cualificación como protexida de
vivendas individuais que se atopen en construción en promocións de vivenda libre, sempre que as
mesmas cumpran os requisitos de prezo máximo e superficie incluídas no plan e o comprador da cumpra
os requisitos establecidos para os adquirentes.
Doutra banda, o Plan prevé tamén a posibilidade de amparar a venda de
vivendas libres xa construídas, sempre que se cumpran as condicións establecidas no Plan e pasara
polo menos un ano entre a obtención da licenza de primeira ocupación e a venda das
mesmas.
Ambas modalidades son de gran interese en concellos onde os promotores non
promoven vivendas protexidas, xa que supoñen un medio alternativo para adquirir vivenda coas axudas
establecidas no Plan e, ao mesmo tempo, permitirán a venda de vivendas construídas que non atoparon
comprador.