Santiago, 30 de decembro de 2009.- Un total de 281 vivendas de promoción pública
construídas polo Instituto Galego da Vivenda e Solo (IGVS) en Eirís e Novo Mesoiro, no concello de
A Coruña, foron sorteadas hoxe entre os seus adxudicatarios nun acto celebrado ante notario no
recinto feiral de Expocoruña.
O sorteo realizouse por cupos, de maneira que se garante que as vivendas adaptadas para
persoas con dificultades de mobilidade se destinen a familias con algún membro nesas condicións e o
reparto de vivendas se realice en función do número de membros da familia, de forma que as familias
con máis membros accedan ás vivendas de maior superficie.
En total o IGVS constrúe en Eirís e Novo Mesoiro un total de 348 vivendas. O sorteo so
incluíu 281 vivendas xa que as restantes 67 corresponden ao concello da Coruña, ben pola cesión
obrigatoria do 10 por cento (16 en Novo Mesoiro e 18 en Eirís) ou ben por ter sido adquiridas pola
administración municipal (33 en Eirís).
Unha vez coñecido qué vivenda corresponde a cada adxudicatario, o IGVS realizará os estudos
económicos correspondentes, no que se establece o prezo de venda ou a renda do alugueiro en cada
caso concreto. Cando ditos estudos estean aprobados o IGVS comunicarao a cada adxudicatario, que
disporá do prazo dun mes para presentar a documentación que se requira e para ingresar o importe do
IVE e unha provisión de fondos para os gastos de notaría e rexistro da propiedade nos casos de
compravenda e a fianza nos de alugueiro. Para os casos de compravenda non existe entrada,
distribuíndose a totalidade do prezo no prazo de 25 anos do préstamo hipotecario.
Eirís
Das 188 vivendas construídas polo IGVS en Eirís, sorteáronse un total de 137 (113 entre os
adxudicatarios e 24 entre os expropiados de Eirís). O investimento foi de 10.552.847,23 euros.
A meirande parte das vivendas sorteadas dispoñen de tres dormitorios e unha superficie útil
entre 78 e 81 metros cadrados. Son en total 90 as vivendas que responden a esta configuración.
Outras 37 dispoñen de dous dormitorios e unha superficie útil de entre 63 e 65 metros cadrados e as
restantes 10 vivendas dispoñen de catro dormitorios e superficie útil de 90 metros cadrados.
Tódalas vivendas dispoñen de cociña, estar-comedor, baños, tendedeira, rocho e unha praza de
garaxe.
Entre as 37 vivendas de dous dormitorios existen catro adaptadas para persoas con mobilidade
reducida, nas que a superficie se incrementa ata os 70,81 metros cadrados.
O prezo das vivendas adxudicadas en compravenda oscila entre os 60.000 e os 100.000 euros,
dependendo da tamaño, pero os adxudicatarios pagan entre o 50 e 0 70 por cento de dito prezo, en
función da renda familiar, polo que os prezos efectivamente pagados polos adxudicatarios oscilará
entre os 30.000 e os 70.000 euros. No caso das vivendas adxudicadas en réxime de alugueiro, a renda
anual será o 3 por cento do prezo que pagarían pola vivenda de ser adxudicada en compravenda. A
normativa que rexe a adxudicación de vivendas de promoción pública indica que é obrigatoria a
adxudicación en réxime de alugueiro cando os ingresos familiares ponderados non superan 1,5 veces o
Indicador Público de Renda de Efectos Múltiples (IPREM).
As vivendas están construídas en catro bloques, todos eles con baixo e dez plantas e dous
sotos para garaxes e rochos. O bloque 1 conta ademais con dúas entreplantas e o bloque 4 con baixo
cuberta.
Nesta promoción corresponden ao concello de A Coruña un total de 51 vivendas (18 por cesión
obrigatoria do 10% e 33 adquiridas polo concello), que compoñen a totalidade do bloque 4 máis unha
vivenda emprazada no bloque 3. Destas 51 vivendas, 33 son de dous dormitorios e 18 de tres
dormitorios).
Novo Mesoiro
Polo que respecta a Novo Mesoiro, sorteáronse 144 das 160 vivendas construídas,
correspondendo ao concello as 16 restantes. O investimento realizado polo IGVS na súa construción
foi de 12.725.472,45 euros.
A meirande parte das vivendas sorteadas dispoñen de tres dormitorios e unha superficie útil
entre 78 e 83 metros cadrados. Son en total 114 as vivendas que responden a esta configuración.
Outras 16 dispoñen de dous dormitorios e unha superficie útil de entre 60 e 62 metros cadrados e as
restantes 14 vivendas dispoñen de catro dormitorios e superficie útil entre 88 e 90 metros
cadrados. Tódalas vivendas dispoñen de cociña, estar-comedor, baños, tendedeira, rocho e unha praza
de garaxe.
Entre as 114 vivendas de tres dormitorios existen seis adaptadas para persoas con mobilidade
reducida, nas que a superficie é de 82 metros cadrados.
O prezo das vivendas adxudicadas en compravenda oscila entre os 60.000 e os 100.000 euros,
dependendo da tamaño, pero os adxudicatarios pagan entre o 50 e 0 70 por cento de dito prezo, en
función da renda familiar, polo que os prezos efectivamente pagados polos adxudicatarios oscilará
entre os 30.000 e os 70.000 euros. No caso das vivendas adxudicadas en réxime de alugueiro, a renda
anual será o 3 por cento do prezo que pagarían pola vivenda de ser adxudicada en compravenda. A
normativa que rexe a adxudicación de vivendas de promoción pública indica que é obrigatoria a
adxudicación en réxime de alugueiro cando os ingresos familiares ponderados non superan 1,5 veces o
Indicador Público de Renda de Efectos Múltiples (IPREM).
Estas vivendas compoñen un bloque con catro portais, con tres sotos para garaxes e rochos,
planta baixa para portais e locais para o concello da Coruña, e dez plantas para vivendas.
O concello da Coruña dispón en Novo Mesoiro de 16 vivendas de tres dormitorios,
correspondentes ao 10 por cento de cesión obrigatoria.