• A conselleira de Medio Ambiente, Territorio e Vivenda participou esta mañá na Comisión de
Seguimento que avalou esta decisión, co fin de facilitar o asentamento nesta zona empresarial
estratéxica das entidades xa interesadas
• Avanza que a previsión do Instituto Galego de Vivenda e Solo é iniciar neste mesmo
trimestre as obras de urbanización desta área empresarial no sur de Galicia con 400.000 m2
• Ángeles Vázquez adianta a segunda fase desta área empresarial abrirá a posibilidade de
agrupar parcelas para facilitar grandes implantacións de empresas e se fará un estudo para analizar
os custes das parcelas co fin de ofrecelas a un prezo competitivo
• A Plisan é unha área loxística impulsada pola Xunta de Galicia, a Autoridade Portuaria e a
Zona Franca de Vigo, na que se inviste un orzamento de máis de 230 millóns para a súa completa
execución
Vigo, 25 de xaneiro de 2019.- A conselleira de Medio Ambiente, Territorio e
Vivenda, Ángeles Vázquez, indicou hoxe que a Xunta vén de poñer enriba da mesa a resolución que
permite desbloquear a venta de solo empresarial na Plisan. Así o avanzou esta mañá tras a reunión
da Comisión de Seguimento da Plisan, na que se acordou que o Instituto Galego de Vivenda e Solo
elaborou o documento xurídico para declarar a natureza patrimonial do solo da Plisan, un requisito
imprescindible para poder iniciar xa o proceso de comercialización das parcelas.
Así, este mesmo trimestre poderanse iniciar as obras de urbanización da plataforma loxística
da Plisan, despois de conseguir unha solución á situación de bloqueo desta área empresarial, por
mor da sentenza do Tribunal Supremo do ano 2017 -na que se ditaba que parte dos terreos da
Autoridade Portuaria eran bens de dominio público- e que imposibilita a comercialización das
parcelas.
Ángeles Vázquez salientou que esta resolución -xunto co axuste lexislativo para dar plena
garantía e seguridade xurídica ao proceso- é unha resposta efectiva á comercialización das parcelas
e sobre todo para que o proxecto avance de forma áxil e segura.
Engadiu que esta medida é a mostra do firme compromiso e do traballo levado a cabo pola
Xunta, xunto cos outros promotores da Plisan: Autoridade Portuaria de Vigo e Consorcio da Zona
Franca de Vigo, para atopar unha solución o máis áxil posible e permitir crear emprego e un
importante desenvolvemento empresarial nunha zona estratéxica do sur de Galicia, evitando o risco
de que as empresas -que xa teñen trasladado o seu interese- se estableceran noutra zona, destacou.
Recordou que a Plisan é un importante e estratéxico proxecto empresarial para o cal as tres
entidades promotoras prevén un investimento superior aos 231 millóns de euros. Grazas a esta
actuación disporase dunha superficie empresarial de 400.000 m2, que se executarán en dúas fases.
Reiterou que as previsións dos promotores son iniciar as obras de urbanización da primeira fase e
da Edar e a Etap necesarias este mesmo trimestre e rematalas no prazo dun ano; e adiantou que será
tamén o Consorcio da Zona Franca a que se encargue da licitación e da execución das obras de
urbanización da segunda fase.
A conselleira de Medio Ambiente tamén avanzou que no seo da reunión celebrada esta mañá
abordouse acometer unha parcelación maior nas obras de urbanización da segunda fase, actualmente en
proxecto de redacción e que dotará doutros 200.000 m2, co fin de posibilitar a comercialización de
parcelas a grandes implantacións empresariais, aos que tamén se lles brindará un prezo competitivo
para favorecer e atraer a implantación de grandes empresas, é dicir, favorecer a riqueza e xeración
de emprego a través do asentamento empresarial na Comunidade galega.