• A conselleira de Medio Ambiente, Territorio e Vivenda visitou esta mañá os edificios que está
a rehabilitar o Instituto Galego da Vivenda e Solo no Barrio da Tinería, co fin de facilitar un
fogar aos veciños, ao tempo que se revitaliza o patrimonio da Cidade da Muralla
• Recorda que a Administración galega leva máis de 26 millóns de euros na recuperación e
rehabilitación do patrimonio edificatorio do barrio da Tinería
• Ángeles Vázquez salienta que estas actuacións responden ao compromiso de loitar contra o
abandono edificatorio dos concellos de Galicia e por dar vida aos centros históricos e aos
concellos galegos
Lugo, 25 de novembro de 2019-. A conselleira de Medio Ambiente, Territorio e
Vivenda, Ángeles Vázquez, salientou esta mañá que o departamento que dirixe, a través do Instituto
Galego de Vivenda e Solo, manterá unha reunión con técnicos co Concello de Lugo, para abordar a
posibilidade de que a Administración local ceda a autonómica varios inmobles emprazados nas
proximidades do Pazo de Dona Urraca (UI-8), para que sexan incluídos na actuación de revitalización
desta zona de Lugo.
Así o adiantou esta mañá a conselleira de Medio Ambiente durante unha visita ás obras de
rehabilitación de varios inmobles no Barrio da Tinería, que está a executar o IGVS, onde aclarou
que estas futuras actuación se sumarán ás intervencións actuais do Goberno galego para recuperar a
contorna do Pazo de Dona Urraca e onde se emprazará a oficina de turismo da Xunta en Lugo.
Salientou que o IGVS encargou xa a redacción do proxecto de rehabilitación e a previsión é licitar
en 2020 as obras, que deberán acompasarse co desenvolvemento do ámbito UI-8.
Esta liña de actuacións da Xunta responde ao compromiso de loitar contra o abandono
edificatorio dos concellos de Galicia e pola aposta de dar vida aos centros históricos, dúas eivas
que se acadan coa actuando en edificios para usos públicos e facilitando aos veciños fogares nos
que levar a cabo o seu proxecto de vida.
Nese sentido, a conselleira destacou as actuacións que o Instituto Galego de Vivenda e Solo
está a levar a cabo na zona da Tinería, onde xa se investiron máis de 26 millóns de euros, e onde a
través do Programa Rexurbe se investirán 780.000 euros.
Salientou que se veñen de rematar as obras de rehabilitación de dúas unidades edificatorias
das que resultan tres vivendas, dúas situadas na Tinería Nº30 e outra na rúa Recanto do Miño 11-13,
que serán adxudicadas en réxime de alugueiro. Por outro lado, destacou o avance das obras de
rehabilitación do edificio Tinería-15, onde se recupera o edifico existente e se amplía cara o
solar contiguo, e do inmoble na rúa Recanto do Miño-17.
En definitiva todas estas actuacións son unha mostra da firme aposta da Xunta pola
recuperación deste barrio da Cidade da Muralla, situado nun enclave patrimonial e histórico
privilexiado; co fin de converter os concellos galegos, neste caso concreto, a Lugo, en lugares
atractivos para vivir, para traballar e para visitar.