• A conselleira de Medio Ambiente, Territorio e Vivenda, Ángeles Vázquez, tivo hoxe unha
videoconferencia con representantes da Federación Galega da Construción e da Cámara de
Contratistas, aos que garantiu tamén que o Goberno autonómico manterá os compromisos adquiridos no
Plan de Vivenda para 2020 e 2021
Santiago de Compostela, 15 de abril de 2020.- A conselleira de Medio Ambiente,
Territorio e Vivenda, Ángeles Vázquez, mantivo esta mañá unha videoconferencia cos representantes
da Federación Galega da Construción e da Cámara de Contratistas de Galicia para analizar as
consecuencias que está a ter para este sector a declaración do estado de alarma polo COVID-19, así
como as últimas medidas anunciadas polo Goberno central en materia de vivenda e as decisións
adoptadas tamén neste sentido pola Xunta.
Unha vez retomada a actividade dos sectores produtivos non esenciais, entre os que se atopa a
construción, Vázquez Mejuto explicoulles que o Consello da Xunta acordou reactivar máis de 500
obras en toda a comunidade, parte delas, dependentes do seu departamento. En concreto,
trasladoulles que se retomaron un total de 13 obras de rehabilitación do Instituto Galego da
Vivenda e Solo (IGVS) e da empresa pública Xestur que dan traballo a 200 persoas nas localidades de
Betanzos, Lugo, Vigo, Pontevedra, Salvaterra de Miño, Arteixo, A Pontenova e Santiago de
Compostela.
En todos estes casos, as actuacións foron reactivándose de forma paulatina desde o luns 13 de
abril, unha vez levantada polo Estado a paralización da actividade non esencial e previa adopción
das medidas de protección recomendadas, como o mantemento dun aforo dentro da obra de entre dous e
tres traballadores. A este respecto, aproveitou tamén a xuntanza para lembrarlles que hai uns días
o Issga publicou unha guía de prevención de riscos e seguridade laboral para resolver dúbidas e
orientar ás empresas sobre as medidas de protección que deben adoptar co seu persoal.
En todo caso, a conselleira aclarou que algunhas obras de rehabilitación do IGVS aínda seguen
paralizadas en cumprimento da instrución do Estado de non retomar aqueles traballos que afecten a
edificios habitados, unha decisión que, indicou, está a ter xa un impacto económico sobre as
empresas adxudicatarias.
De feito, os representantes de ambas entidades trasladáronlle á responsable autonómica que,
segundo os cálculos do propio sector, hai uns 20.000 traballadores autónomos e de pemes afectados
pola prohibición do Goberno de retomar os traballos a executar en inmobles habitados, polo que
demandaron maior seguridade xurídica e claridade sobre o alcance do actual estado de alarma neste
sector.
Obras Hurbe
Ademais de retomar un número importante das obras de rehabilitación dependentes do seu
departamento, Ángeles Vázquez indicoulles aos construtores e contratistas galegos que nos últimos
días se están a reiniciar paulatinamente as obras de humanización, mellora e renovación de
elementos urbanos cofinanciadas entre Xunta e concellos ao abeiro do Plan Hurbe.
Durante a xuntanza, os representantes das empresas de construción e dos contratistas
trasladáronselle á conselleira a inquedanza do sector polas contradicións e a falta de concreción
do Goberno á hora de trasladarlle ao tecido produtivo algunhas das súas decisións, así como polas
posibles repercusións económicas da aplicación do real decreto de 31 de marzo de medidas
complementarias no ámbito social e económico fronte ao COVID-19.
Neste sentido e tras compartir as inquedanzas do sector, a conselleira lembrou que grazas ás
subvencións do Plan Estatal de Vivenda, en Galicia xéranse cada ano preto de 3.000 postos de
traballo, na súa meirande parte vencellados directamente ao sector construtivo.
Por iso, Ángeles Vázquez trasladoulles unha mensaxe de tranquilidade aos empresarios ao
subliñar que a Xunta comprométese a non modificar o Plan de Vivenda e continuará a senda
administrativa iniciada para seguir reactivando obras. Así, engadiu que a súa intención é destinar
os preto de 42 millóns de euros asignados á comunidade neste plan para os anos 2020 e 2021 ás
axudas e programas que xa están en marcha nestes momentos e dos que, lembrou, se benefician tamén
parte das empresas representadas por ambas entidades.
Na mesma liña, insistiu en que non se pode modificar o contido do Plan Estatal de Vivenda
2018-2021 de forma unilateral e sen escoitar ás comunidades nin aos sectores produtivos implicados,
e trasladoulles que por iso, esta mesma semana dirixiuse por carta ao ministro de Trasportes,
Mobilidade e Axenda Urbana, José Luis Ábalos, para transmitirlle a súa oposición a que o Goberno
utilice e desvíe fondos xa asignados e no caso galego comprometidos na súa maior parte, a financiar
unha nova orde axudas dirixida aos mesmos colectivos vulnerables que se benefician dos programas
previstos no devandito plan.
Por último, a conselleira comprometeuse tamén a axilizar todos aqueles trámites e permisos
que entren no eido das súas competencias e, en especial, os relativos ás autorizacións ambientais
que requiren determinadas obras. Asimesmo, tendeulle a man ao sector para colaborar na elaboración
dun plan de investimentos claro e definido que facilite á volta á normalidade e axude a xerar
confianza nas empresas nun contexto de grandes dificultades económicas.