• A conselleira de Medio Ambiente, Territorio e Vivenda visitou esta mañá o parque
empresarial das Gándaras, o segundo polígono no que se ten adxudicado máis solo desde o inicio do
programa de incentivos do IGVS en 2015
• Coa segunda fase de ampliación dispóñense case 90.000 m2, nos que se definirán dúas
parcelas, máis de 500 prazas de aparcamento e unha praza pública
• Recorda que tamén se traballa na modificación do proxecto sectorial do Parque das Gándaras
que se prevé aprobar o vindeiro ano
Lugo, 6 de novembro de 2020.- A conselleira de Medio Ambiente, Territorio e
Vivenda, Ángeles Vázquez, avanzou esta mañá que as obra de urbanización da segunda fase do polígono
das Gándaras comezarán antes de que remate o ano. A conselleira de Medio Ambiente visitou esta mañá
esta área empresarial, onde destacou que as obra foron adxudicadas por un importe de 2,6 millóns de
euros e un prazo de execución de 10 meses.
Ángeles Vázquez salientou que a demanda de solo en relación con esta zona motivou á Xunta a
promover a ampliación desta parque, co fin de ofrecer espazo ao tecido de empresarial que desexa
asentarse na Cidade da Muralla.
Grazas a ampliación do parque, coa segunda fase, disporanse case 90.000 m2 nesta zona; nas
que se construirán dúas parcelas -unha de maior tamaño, de 25.000 m2 e outra de 8.990 m2-, así como
unha zona de aparcadoiro de 20.000 m2 para dispoñer máis de 380 prazas de aparcadoiro, que ascenden
a 530 si se teñen en conta as prazas dispoñibles nos viarios. Tamén se construirá unha praza
pública que ocupará unha superficie de máis de 6.000 m2.
Tal e como manifestou a conselleira os case 90.000 m2 desta nova fase son un pulo e apoio
importante para a actividade económica da cidade e da provincia de Lugo, non só por habilitar
espazo no que asentarse, senón tamén porque se poden beneficiar da bonificación dun 50% sobre o
prezo de venda, grazas ás medidas impulsadas pola Xunta desde o ano 2015 para mobilizar a venta de
solo empresarial en Galicia. De feito, a conselleira destacou que o Polígono empresarial das
Gándaras é a segunda superficie empresarial na que máis solo bonificado se adxudicou desde o ano
2015, despois do Polígono de Bértoa en Carballo.
Por outra banda, a conselleira recordou que a Xunta está a tramitar unha Modificación do
Proxecto Sectorial do Parque Empresarial das Gándaras, unha iniciativa que xa finalizou o seu
trámite de exposición pública e que -segundo as previsións do Instituto Galego de Vivenda e Solo-
poderá aprobarse en 2021.
Sinalou que no momento no que se aprobe esta modificación, a Xunta poderá acometer a Fase 3,
unha nova ampliación coa que se incrementará en máis de 67.000 m2 este polígono para definir case
40 novas parcelas, cunha superficie media de 1.000 m2 cada unha, co fin de atender as necesidades e
demanda que teñen trasladado os empresarios.
Por último, a conselleira trasladou que con estas actuacións no Parque das Gándaras, e a
proximidade co Polígono do Ceao e á autovía A-6, Lugo convertese nun referente empresarial e
industrial para a provincia e a Comunidade.