- A delegada territorial, Marisol Díaz, xunto co alcalde da cidade, Jesús Vázquez, visitou hoxe
este barrio e explicou que o proxecto permitirá obter 3 vivendas de promoción pública e un local
- Con esta licitación, na actualidade a Consellería de Infraestruturas e Vivenda está a
traballar na recuperación de catro inmobles
- O IGVS destinará 800.000 euros á adquisición de novos inmobles para rehabilitar na zona
histórica de Ourense ao abeiro do Programa Rexurbe
Ourense, 8 DE marzo de 2018.-O Diario Oficial de Galicia publica hoxe a
licitación
das obras de rehabilitación do edificio da rúa Cervantes 14, emprazado no casco vello de Ourense,
adquirido polo Concello da cidade e cedido á Xunta para a súa recuperación e mellora, para
destinalo, de modo prioritario, a vivenda social.
Este proxecto terá un prazo de execución de 12 meses dende o inicio das obras. As empresas
interesadas dispoñen dun prazo de 26 días naturais, a contar dende mañá, para a presentación das
súas ofertas.
A delegada territorial da Xunta, Marisol Díaz Mouteira, xunto co alcalde da cidade, Jesús
Vázquez, visitou hoxe este barrio no que o Goberno galego está a traballar na súa rehabilitación co
obxectivo de recuperalo e revitalizalo para facelo un lugar máis atractivo para vivir, para
traballar e para visitar.
Díaz Mouteira precisou que a Xunta investirá máis de 650.000 euros na rehabilitación deste
inmoble, que, unha vez finalizada, permitirá poñer á disposición dos veciños de Ourense 3 novas
vivendas de promoción pública e un local. Unha vez licitadas estas actuacións, continuaranse cos
trámites administrativos necesarios para iniciar as obras ao longo deste ano.
Con este anuncio de licitación, na actualidade a Consellería de Infraestruturas e Vivenda ten en
marcha actuacións en 4 inmobles da zona antiga da capital ourensá (en Vilar 1, Vilar 3 e 5, e
Cervantes 14) que permitirán poñer a disposición dos veciños de Ourense 8 novas vivendas.
LOCALIZACIÓN
|
ESTADO
|
Nº VIVENDAS
|
IMPORTE €
|
Cervantes 14
|
Licitada o 8/3/2018
|
3 vivendas e 1 local
|
650.710,42
|
Vilar 3-5
|
Licitada o 7/12/2017
|
3 vivendas
|
559.951,00
|
Vilar 1
|
Obra iniciada en abril de 2017
|
2 vivendas
|
373.662,45
|
Estes inmobles viranse a sumar aos 10 que nestes momentos xa están rehabilitados e dos que se
obtiveron un total de 22 vivendas e 10 locais comerciais, e que supuxeron un investimento por parte
da Xunta que supera os 3,2 millóns de euros.
Programa Rexurbe
A delegada territorial subliñou a aposta da Xunta pola rehabilitación. Así lembrou que o
Instituto Galego da Vivenda e Solo adquirirá inmobles no casco vello de Ourense para proceder á súa
rehabilitación, co obxectivo de acadar arredor de 13 novas vivendas rehabilitadas, destinando este
ano 800.000 euros a esta compra. Esta actuación enmarcase no programa Rexurbe co que a Xunta de
Galicia traballa na recuperación de cascos históricos de diferentes vilas e cidades galegas.
Os propietarios interesados en vender os seus inmobles ao IGVS dispoñen de prazo para
presentar as súas ofertas ata o 22 de abril de 2018.
Os inmobles que adquira o IGVS deberán estar situados no casco vello de Ourense, nas rúas
Vilar, Cervantes, Xerónimo Feijoo, Colón, Libertade, Xulio Prieto Nespereira, Hernán Cortés, García
Mosquera, Lugo, Pelaio, 2 de Maio, Manuel Sueiro, Padilla, Triunfo, do Perigo, Moratín, Primavera e
Bailén e nas prazas da Victoria, do Sal, Imprenta, da Trinidade, Saco e Arce, Pena Vixía, San
Marcial, de San Cosme e da Ferreira, así como en Camiño Canella Cega. Estes inmobles, ademais de
atoparse en estado de abandono ou semiabandono, deben reunir uns requisitos como estar inscritos no
Rexistro da Propiedade ou non estar afectadas por servidumes ou cargas que podan facer inviable a
actuación, entre outros.
Por outro lado, Díaz Mouteira lembrou que en materia de vivenda, a Xunta tamén está a
construír outras oito vivendas de promoción pública na rúa Covadonga cun investimento de 790.000
euros.