Santiago, 27 de maio de 2009.- O Instituto Galego da Vivenda e Solo, dependente da
Consellería de Medio Ambiente, Territorio e Infraestruturas, comezou o levantamento de actas de
pago e ocupación dos terreos sobre o que se asentará o parque empresarial de A Sionlla, en Santiago
de Compostela. A previsión deste organismo é rematar con estes traballos o próximo 5 de xuño. O
importe total das expropiacións de solo e bens previsto no expediente acada os 29,7 millóns de
euros, aos que hai que sumar outros 24,6 millóns de euros das obras de urbanización, que foron
adxudicadas polo anterior Goberno da Xunta á empresa San José. O parque empresarial de A Sionlla
emprázase na estrada de Santiago á Coruña, na zona onde xa está situada a empresa Finsa. Ocupará un
total de 1.453.000 m2, dos que 1.383.000 m2 corresponderán ao propio parque empresarial e o
restante (70.000 metros cadrados) destinaranse ás conexións exteriores do mesmo. Haberá un total de
138 parcelas, que ocuparán unha superficie total de 778.000 m2. Os equipamentos ocuparán 51.000 m2,
a terminal de transportes e ferrocarril 72.700 m2, as zonas verdes 215.000 m2, os servizos técnicos
21.000 m2 e os viarios e aparcamentos 242.000 m2.
SAÚDOS,
GABINETE DE COMUNICACIÓN DA CONSELLERÍA DE MEDIO AMBIENTE, TERRITORIO E INFRAESTRUTURAS