• A Consellería de Medio Ambiente, Territorio e Vivenda porá á venda 14 parcelas das fases xa rematadas e 27 da 3ª fase, cuxas obras de urbanización serán adxudicadas en breve
• Ángeles Vázquez salienta a función de polo empresarial das Gándaras, no que a Xunta mobilizou 53 millóns de euros para actuacións executadas ou en curso, un parque do que xa se venderon 257.000 m2 que xeraron un aforro de máis de 12 millóns de euros
• A conselleira destaca que os empresarios apostan pola Comunidade, onde a Xunta adxudicou 93 parcelas en 21 parques empresariais e, especialmente, por Lugo, xa que un terzo das parcelas vendidas localízanse en sete parques da provincia
• Avanza que en 2022 o Goberno galego manterá este esforzo e apoio para xerar oportunidades, grazas á mobilización de 34 millóns de euros para reforzar o solo empresarial

Lugo, 28 de decembro de 2022.- A Xunta convocará no primeiro trimestre de 2022 o concurso de venda de solo no parque empresarial das Gándaras, co que se disporán 88.000 m2 para a instalacións de empresas.

Así o adiantou esta mañá a conselleira de Medio Ambiente, Territorio e Vivenda, Ángeles Vázquez, que visitou esta zona empresarial e fixo entrega ao Concello de Lugo -representado pola alcaldesa, Lara Méndez- das obras de urbanización da segunda fase.

Vázquez Mejuto salientou a función de polo empresarial das Gándaras non só para a provincia de Lugo, senón tamén para Galicia e destacou o compromiso do Goberno galego con esta área empresarial á que xa ten destinado 53 millóns de euros para actuacións executadas ou en curso.

Detallou que na actualidade neste parque hai dispoñibles 14 parcelas nos ámbitos xa urbanizados, que representan unha superficie de case 52.000 m2, ás que se suman as 27 que resultarán tras a execución das obras de urbanización da 3ª fase. Nese sentido, avanzou que o Instituto Galego da Vivenda e Solo prevé adxudicar en breve esta actuación, que permitirá crear unha bolsa de solo de case 36.000 m2, unha praza de máis de 3.000 m2 e case 140 prazas de aparcamento.

A conselleira de Medio Ambiente recordou que este solo empresarial tamén se porá á venda cun prezo bonificado dun 50%, e engadiu que os empresarios que adquiriron 257.000 m2 neste parque da cidade de Lugo, xa se beneficiaron destes descontos cos que aforraron máis de 12 millóns de euros.

Vázquez Mejuto defendeu que este tipo de medidas son un atractivo para que as empresas aposten por Galicia. De feito, no ano 2021, a Xunta adxudicou 93 parcelas en 21 parques empresariais, que se traduciu nun aforro para os empresarios de 9,7 millóns de euros. “Tendo en conta que un terzo das parcelas adxudicadas (34) estaban localizadas nun parque empresarial de Lugo (7), o interese e potencial dos empresarios por esta provincia é patente”, aclarou.

Indicou que a Xunta é a única administración que aplica -desde o ano 2015- este tipo de incentivos, cun resultado moi positivo: a adxudicación de máis de 2,3 millóns de euros por un importe de 70 millóns de euros. Manifestou que no vindeiro ano se manterá este esforzo, grazas á habilitación dunha partida específica de 7,5 millóns de euros para incentivar a adquisición de solo empresarial, promovido polo Goberno galego.

Asemade, recordou que tamén se levarán a cabo actuacións para mellorar ou ampliar parques empresarias en activo, grazas a un investimento de 27 millóns de euros. Aclarou que se actuará tanto en parques próximos ás áreas metropolitanas, como o de Morás en Arteixo, como nos localizados en concellos rurais, como en Xinzo, Paderne de Allariz ou Pontecesures.

Aclarou que -dese total- a provincia de Lugo recibirá 6 millóns de euros para actuar -ademais de no parque das Gándaras- no Corgo, Muimenta, Cospeito, Palas de Rei, Castro de Ribeiras de Lea, A Pontenova e Taboada.

Por último, explicou que a implantación de empresas nos parques empresariais galegos está motivada tamén pola dilixencia e axilidade que o IGVS aplica na tramitación dos distintos expedientes das actuacións que se levan a cabo, tal e como puido comprobar a última das entidades que adquiriu solo nas Gándaras. “Esta simplificación e axilidade aínda se acentuará e blindará máis no ano 2022, defendeu, coa aprobación da primeira Lei de áreas empresariais de Galicia, que converterá a esta comunidade na primeira do Estado en contar cunha normativa específica.