-
Entrarán no sorteo todos os inscritos no Rexistro de Demandantes antes do 27 de xaneiro, data
en que a Comisión Provincial de Vivenda acordou iniciar o procedemento de adxudicación.
Santiago, 11 de febreiro de 2010.-
O sorteo de 31 vivendas de promoción pública en Vilagarcía de Arousa e 15 en Ribadumia
construídas polo Instituto Galego da Vivenda e Solo, dependente da Consellería de Medio Ambiente,
Territorio e Infraestruturas, realizarase o próximo luns, 15 de febreiro, nas dependencias da
xefatura provincial do IGVS en Pontevedra.
O procedemento para a adxudicación das 46 vivendas que se atopan en construción foi acordado
pola Comisión Provincial de Vivenda na súa última reunión, celebrada o pasado 27 de xaneiro.
No sorteo entrarán todos os inscritos no Rexistro de Demandantes con anterioridade a data de
dita reunión (27 de xaneiro).
Vilagarcía de Arousa
En Vilagarcía de Arousa trátase de 31 vivendas de promoción pública, baixo a modalidade de
aloxamentos protexidos, nas que o Instituto Galego da Vivenda e Solo está a investir un total de
2.344.927,23 euros, aos que hai que sumar 359.130,49 euros destinados á construción do centro de
día que ocupará os baixos do edificio.
A meirande parte dos aloxamentos protexidos construídos en Vilagarcía de Arousa dispoñen de
un dormitorio e unha superficie útil de 40 metros cadrados. En total son 27 os aloxamentos destas
características, mentres os 4 restantes teñen dous dormitorios e unha superficie útil de 50 metros
cadrados.
Ribadumia
No caso de Ribadumia son 15 vivendas as vivendas de promoción pública que están sendo
construídas polo IGVS en Barrantes, cun investimento de 1.456.797,72 euros.
Catro das vivendas dispoñen de catro dormitorios, cunha superficie útil de máis de 85 metros
cadrados; oito teñen tres dormitorios e superficie útil entre 71 e 77 metros cadrados e outras tres
teñen dous dormitorios e superficie útil superior a 60 metros cadrados. Tódalas vivendas contan con
estar-comedor, cociña, baños, trasteiro e praza de garaxe.
As vivendas contan con carpintería exterior de aluminio anodizado e interior de taboleiro DM
pintado, con porta blindada de madeira de pino na entrada.
Tódalas vivendas contan con calefacción por chan radiante e auga quente sanitaria individual,
con caldeira de gasóleo individual. O edificio está dotado de paneis captadores de enerxía solar
para a produción de auga quente.
