§
Informa de que o Goberno galego está avanzando nos proxectos para actuar en dous
bloques coa fin de optimizar a eficiencia enerxética dos inmobles, entre outros obxectivos
§
A conselleira comprométese a atender
a solicitude de
melloras de seguridade na estrada AC-840, que se dotará dun carril
central na intersección coa vía local a Zas de Rei para aumentar a visibilidade
§
Destaca que a Xunta está a traballar no
proxecto para substituír o colector de saneamento existente na rúa San Pablo para
solucionar os problemas que se producen nos días de precipitacións intensas
§
A
Axencia Galega de Infraestruturas tamén talará unhas 600 árbores nun treito desta vía co obxectivo
de incrementar a seguridade na zona
Santiago, 16 de febreiro de 2017.-
A conselleira de Infraestruturas e Vivenda, Ethel Vázquez, mantivo unha xuntanza de
traballo coa alcaldesa de Melide, Dalia García, na que lle trasladou que a Xunta realizará obras de
mellora nas vivendas de promoción pública deste municipio mediante un investimento de máis de
860.000 euros.
Vázquez Mourelle explicou que o Instituto Galego da Vivenda e Solo (IGVS) está
avanzando nos proxectos para actuar en dous bloques, xa que un deles xa está redactado e
supervisado e o outro está en redacción. Precisou que con estes traballos mellorarase a eficiencia
enerxética dos inmobles destes edificios.
No encontro, a conselleira tamén lle comunicou á rexedora que o seu departamento
está traballando en proxectos de varias actuacións de mellora na rede viaria autonómica ao seu paso
polo Concello de Melide coa fin de incrementar a seguridade na zona.
A titular de Infraestruturas lembrou que a Xunta vén de licitar un contrato que
inclúe obras de reforzos de firmes en varios tramos de estradas autonómicas na provincia da Coruña,
entre as que se atopa a que une Betanzos co límite da provincia e Agolada (AC-840), na que
executarán rehabilitacións puntuais ao seu paso polo Concello de Melide.
A conselleira comprometeuse a atender a solicitude para dotar dun carril central á
estrada AC-840, no Pq. 46+100, na intersección coa vía local a Zas de Rei. Con estes traballos
aumentarase a visibilidade neste punto e polo tanto, tamén a seguridade.
Nesta reunión, a responsable de Infraestruturas tamén indicou que o seu departamento
está a avanzar no proxecto para a reposición de servizos na mesma estrada, no tramo entre os Pq.
50+260 e 50+410, concretamente na rúa San Pablo, onde se prevé substituír o colector de saneamento.
Esta actuación solucionará os problemas que se veñen producindo nesta zona os días de
precipitacións intensas.
A Consellería de Infraestruturas tamén levará a cabo a tala de 600 árbores na
estrada AC-840, concretamente no treito comprendido entre os puntos quilométricos 53 e 59, co
obxectivo de aumentar a seguridade nesta área.