A vivenda e o solo empresarial son dúas das competencias da Consellería que dirixo, xunto co
medio ambiente e o urbanismo, sobre as que poderá atopar toda a información nesta páxina web, á que
lle dou a benvida.
A través do Instituto Galego da Vivenda e Solo (IGVS) xestionamos as políticas de vivenda, de
solo residencial e de solo empresarial na procura de dous obxectivos: a mellora das condicións de
vida dos galegos e galegas e a dotación de solo axeitado para o asentamento de empresas que creen
emprego e riqueza na nosa Comunidade.
Un dos eixos fundamentais da nosa política de vivenda é a rehabilitación porque avogamos pola
recuperación do xa construído e pola posta en valor das nosas vilas e cidades e de zonas tan
importantes a nivel patrimonial como son os conxuntos históricos. Con esa finalidade actuamos
directamente adquirindo e rehabilitando inmobles de carácter residencial e tamén axudamos a
propietarios e a comunidades a executar actuacións nesta liña e colaboramos cos concellos na
recuperación do seu patrimonio.
Facilitarlle o acceso á vivenda aos cidadáns constitúe outro dos nosos obxectivos
prioritarios, tanto a través de axudas para o alugueiro e para a adquisición como a través da
promoción e mantemento dun parque público de vivendas ás que poidan optar as capas máis
desfavorecidas da poboación, que tamén se poden beneficiar do Bono de Alugueiro Social. Neste
sentido, o IGVS tamén promove a urbanización de solo residencial para a construción de vivenda
protexida á que poidan acceder aquelas familias e cidadáns con dificultades para adquirir unha
vivenda no mercado libre.
Finalmente, o desenvolvemento de solo empresarial por parte do Instituto facilita a
implantación de empresas e a ampliación ou traslado das xa existentes a espazos especialmente
pensados para as mesmas, onde contan con todos os servizos necesarios e uns estándares de calidade
superiores. Deste xeito, fomentamos a ordenación do territorio e o asentamento de actividades
económicas que redunden na xeración de emprego na nosa Comunidade.
En definitiva, dende a Consellería de Medio Ambiente, Territorio e Vivenda e, polo tanto,
dende o IGVS traballamos sempre co obxectivo de atender as necesidades dos galegos e galegas,
procurando coidar e poñer en valor o contorno no que se desenvolven as nosas vidas.
Ángeles Vázquez
Conselleira de Medio Ambiente, Territorio e Vivenda.
