Corresponde á
inspección de vivenda o exercicio das seguintes funcións:
-
A investigación e comprobación do cumprimento da Lei de vivenda, as súas disposicións de
desenvolvemento e, en xeral, da normativa sobre vivenda protexida que resulte aplicable na
Comunidade Autónoma de Galiza, practicando cantas medidas sexan necesarias a tal fin.
-
A proposta de adopción de medidas provisionais e definitivas para asegurar o cumprimento da
lexislación vixente, incluídas as de protección e restauración da legalidade.
-
A proposta de incoación de expedientes sancionadores e medidas de protección e restablecemento
da legalidade que procedan de acordo coa lexislación vixente.
Os inspectores e inspectoras de vivenda teñen a condición de axentes da autoridade, poden
solicitar o apoio necesario de calquera outra autoridade no seu correspondente ámbito competencial,
concretamente das Forzas e Corpos de Seguridade do Estado, especialmente da Policía Autonómica e
das Policías Locais e están autorizados para entrar e permanecer libremente e en calquera momento
en inmobles, construcións e demais lugares suxeitos a súa actuación inspectora, respectando, en
todo caso, os dereitos á intimidade persoal e familiar e á inviolabilidade do domicilio dos
interesados ou interesadas. Os inspectores e inspectoras de vivenda deberán acreditar en todo caso
a súa condición coa correspondente credencial.
Cando para o exercicio desas funcións inspectoras fora precisa a entrada nun domicilio,
solicitarase a oportuna autorización xudicial salvo consentimento do afectado ou afectada. Cando
sexa precisa a autorización xudicial, na solicitude de autorización deberase identificar da forma
máis precisa posible o local ou recinto que se pretenda inspeccionar, xustificando os indicios que
fagan sospeitar da comisión dunha infracción administrativa e identificando ao funcionario ou
funcionaria que dirixirá a inspección, así como o número de persoas que deban acompañarlle. Unha
vez realizada a inspección, levantarase acta das actuacións realizadas e elevarase copia auténtica
ao órgano xudicial que teña outorgado a autorización da entrada.
Os inspectores e inspectoras de vivenda poderán recabar a exhibición da documentación relevante
que obre en poder do interesado ou interesada ou de calquera organismo público ou privado para o
adecuado exercicio da función inspectora. Os/as titulares, representantes legais ou encargados das
fincas, construcións e demais lugares suxeitos á actividade inspectora están obrigados a facilitar
aos inspectores e inspectoras de vivenda o exame das dependencias e a análise de calquera documento
relativo á acción inspectora.
Credencial do persoal da inspección
A tarxeta de identificación é un documento público, persoal e intransferible, que acreditará os
inspectores e inspectoras no exercicio das funcións que legalmente teñen encomendadas.
Con carácter xeral, na actividade inspectora seguirase o seguinte protocolo de
actuación:
-
Inicio do expediente de inspección, de oficio, por denuncia ou a instancia doutras unidades
da administración autonómica.
-
Unha vez acordado o inicio do expediente, realizarase unha visita de inspección da que se
estenderá a oportuna acta, e de non detectarse irregularidade algunha, procederase ao arquivo do
expediente.
-
No suposto de que se apreciasen indicios de irregularidades ou houbese negativa por parte dos
ocupantes das vivendas a identificarse, ou mediase calquera actuación que poda ser calificada como
de obstrución á actividade inspectora, deberá deixarse constancia deste feito na correspondente
acta e posteriormente procederase a dar audiencia ao interesado ou interesada, por calquera medio
que acredite que se recibiu a documentación, e comunicaráselle ademais da data de comparecencia, a
documentación que debe presentar, advertíndolle que de non facelo, darase traslado do expediente á
Delegación Provincial a efectos da incoación do expediente sancionador o de se-lo caso, proceder ao
desaloxo da vivenda.
-
Trala audiencia, examinarase as alegacións que se formulen e canta documentación se presente
e estenderase acta, procedendo ben ao arquivo do expediente, se así se estima oportuno, ou ben ou
ao seu traslado á Delegación provincial correspondente para a incoación do oportuno
expediente.
-
No suposto de que a inspección tivese coñecemento de situacións de ocupación ilegal pola vía
de feito, porá os feitos en coñecemento da autoridade policial.
